Shqipëria ka mbërritur në Serbi për ta zhvilluar ndeshjen vendimtare për kualifikime në Kupën e Botës të vitit të ardhshëm.

Një ditë para kësaj përballje në konferencë për media së bashku me trajnerin Sylvinho, ka dal edhe Elseid Hysaj, shkruan Arbresh.info.

Ai ka theksuar se kombëtarja është në Serbi vetëm për fitore.

“Këtu në Serbi kemi ardhur për fitore, as për barazim dhe as për humbje. Duhet më shumë se 100% por nga të gjithë ne si ekip. Për mua është ndeshja më e bukur”, tha ai fillimisht.

Më tej foli edhe për masat e sigurisë.

“Masat e sigurisë do të na karikojnë më shumë. Në futboll gjithçka është e paparashikueshme. Ata kanë cilësi, por kemi dhe ne”, u shpreh Hysaj.

Hysaj është një ndër të vetmit që ka qenë i pranishëm në Beograd në ndeshjen e 14 tetorit.

“Emocionalisht, për mua është njësoj si në 2014-ën. E po e përjetoj shumë fort edhe tani. Mezi pres të futem në fushë nesër”, u shpreh Hysaj, duke bërë krahasim të qartë me ndeshjen e famshme në Beograd një dekadë më parë.

Kujtojmë se ndeshja mes këtyre dy kombëtareve do të luhet nesër në Leskovc nga ora 20:45./Arbresh.info